सासवड पोलीस ठाण्याच्या गुन्हे शोध पथकाची धडक कारवाई; गावठी पिस्तूल बाळगणारा 'मोक्का'तील सराईत गुन्हेगार जेरबंद..
प्रतिनिधी-मनोहर गोरगल्ले
सासवड
सासवड पोलीस ठाण्याच्या गुन्हे शोध पथकाने धडक कारवाई करत बेकायदेशीररीत्या गावठी पिस्तूल बाळगणाऱ्या एका सराईत गुन्हेगाराला शिताफीने ताब्यात घेतले आहे. रोहीत राजु माने (वय २४ वर्षे, रा. गुजरवाडी, दत्तनगर, निंबाळकरवस्ती, कात्रज, पुणे) असे अटक करण्यात आलेल्या आरोपीचे नाव असून, त्याच्यावर यापूर्वी ‘मोक्का’सह विविध गंभीर गुन्हे दाखल आहेत.
गस्तीदरम्यान मिळाली गोपनीय माहिती
दिनांक ७ ऑक्टोबर रोजी सासवड पोलीस ठाण्याचे पोलीस निरीक्षक संतोष घोळवे यांच्या मार्गदर्शनाखाली गुन्हे शोध पथक हद्दीत गस्त घालत होते. त्यावेळी मौजे सासवड (ता. पुरंदर) हद्दीतील सैनिक कॅन्टीनच्या पाठीमागे एक संशयित इसम काळ्या रंगाच्या स्प्लेंडर मोटारसायकलसह (क्रमांक: MH 12 TL 8796) थांबल्याची गोपनीय माहिती मिळाली. या माहितीच्या आधारे सहायक पोलीस निरीक्षक शंकर राऊत व पथकाने तत्काळ घटनास्थळी धाव घेतली.
संशयित इसमाकडे नाव-पत्याबाबत विचारणा केली असता तो उडवाउडवीची उत्तरे देऊ लागला. पोलिसांनी पोलिसी खाक्या दाखवत कसून चौकशी केली असता त्याने आपले नाव रोहीत माने असल्याचे सांगितले. तसेच त्याच्या ताब्यातील मोटारसायकलच्या टूल बॉक्समध्ये पिस्तूल असल्याची कबुली दिली.
९६ हजार रुपयांचा मुद्देमाल जप्त
दोन पंचांसमक्ष मोटारसायकलचा टूल बॉक्स उघडून तपासणी केली असता, त्यामध्ये स्टील बॉडीचे देशी बनावटीचे (गावठी) पिस्तूल व मॅगझीन मिळून आले. पोलिसांनी आरोपीकडून खालील मुद्देमाल जप्त केला:
गावठी पिस्तूल: ५०,००० रुपये किमतीचे एक लोखंडी/स्टील बॉडीचे पिस्तूल (बॅरल लांबी १५.५ सेमी, व्यास ८ मिमी).
मॅगझीन: १,००० रुपये किमतीचे एक स्टीलचे मॅगझीन.
मोटारसायकल: ४५,००० रुपये किमतीची काळ्या रंगाची स्प्लेंडर मोटारसायकल (पुढील नंबर प्लेट: MH 12 TL 8796, मागील नंबर प्लेटवर ‘महाकाल’ लिहिलेले).
एकूण ९६,००० रुपयांचा मुद्देमाल जप्त करण्यात आला असून, आरोपीविरुद्ध सासवड पोलीस ठाण्यात गु.र.क्र. ४९२/२०२६ नुसार भारतीय शस्त्र अधिनियम कलम ३, २५ सह महाराष्ट्र पोलीस अधिनियम १९५१ चे कलम ३७(१)(३), १३५ अन्वये गुन्हा दाखल करून त्यास अटक करण्यात आली आहे.
आरोपीवर यापूर्वीही गंभीर गुन्हे दाखल
अटक करण्यात आलेला आरोपी रोहीत माने हा सराईत गुन्हेगार असून त्याच्यावर यापूर्वी खालील पोलीस ठाण्यांमध्ये गंभीर स्वरूपाचे गुन्हे नोंद आहेत:
लोणीकंद पोलीस ठाणे: गु.र.क्र. ३५१/२०२३, कलम ३९४, ३४ भा.दं.वि. सह मकोका (MCOCA) कलम ३(१), ३(२), ३(४).
कोंढवा पोलीस ठाणे: गु.र.क्र. ४४१/२०२३, कलम ४५७, ३८०, ३४ भा.दं.वि. (घरफोडी/चोरी).
खडक पोलीस ठाणे: गु.र.क्र. २३२/२०२२, कलम ३७९ भा.दं.वि. (चोरी).
वाघोली पोलीस ठाणे: गु.र.क्र. ६१२/२०२६, शस्त्र अधिनियम कलम ३, २५ व महाराष्ट्र पोलीस अधिनियम कलम ३७(१)(३), १३५.
वरिष्ठांचे मार्गदर्शन व कारवाई पथक
सदरची उल्लेखनीय कामगिरी पुणे ग्रामीणचे पोलीस अधीक्षक संदीपसिंह गिल्ल, बारामती विभागाचे अप्पर पोलीस अधीक्षक गणेश बिरादार, पुणे विभागाचे अप्पर पोलीस अधीक्षक शुभम कुमार, भोर विभागाचे उपविभागीय पोलीस अधिकारी राजेंद्रसिंह गौर, तसेच पोलीस निरीक्षक संतोष घोळवे यांच्या मार्गदर्शनाखाली करण्यात आली.
या कारवाईत सहायक पोलीस निरीक्षक शंकर राऊत, पोलीस उपनिरीक्षक परमेश्वर गोडसे, पोलीस हवालदार दत्तात्रय काळे (ब.नं. २२४२), पोहवा जाधव, पोलीस नाईक गोकुळ हिप्परकर (ब.नं. २३२९), पोलीस कॉन्स्टेबल तुषार लोंढे (ब.नं. ४३४) आणि पोलीस कॉन्स्टेबल प्रवीण शेंडे (ब.नं. १७१४) यांनी सहभाग घेतला. या गुन्ह्याचा पुढील तपास सहायक पोलीस निरीक्षक शंकर राऊत करत आहेत.